Teisteanas ealain agus dealbhadh air a dhaingneachadh ann an Uibhist còmhla ri cothrom airson tabhartas ghnìomhachasan cruthachail sti&u

Tha UHI a Tuath, an Iar is Innse Gall air dearbhadh gum bi a thairgse ealain agus dealbhadh air a thabhann bho Ionad Ealain Taigh Chearsabhagh an ath bhliadhna tro theisteanas NC Gnìomhachasan Cruthachail, aig a bheil an comas leudachadh gu tairgse nas fharsainge de ghnìomhachasan cruthachail.

Ag obair gu dlùth le luchd-obrach, oileanaich, Taigh Chearsabhagh agus Comann Ealain Uibhist, tha UHI a Tuath, an Iar is Innse Gall air a bhith a’ beachdachadh air mar a leasaicheas iad tairgse airson bliadhna acadaimigeach 2024/2025 a tha iomchaidh, seasmhach agus a’ tabhann slighean gu tuilleadh ionnsachadh no obair.

Chuir a’ cholaiste fàilte air tuilleadh fios air ais bhon choimhearsnachd ionadail mun tairgse ealain agus dealbhadh aice agus chuireadh grunnan choinneamhan air chois sa choimhearsnachd aig deireadh na bliadhna an-uiridh gus barrachd conaltraidh a bhrosnachadh.  Chuireadh buidheann air chois còmhla ri Taigh Chearsabhagh agus Comann Ealain Uibhist gus am fios air ais a tharraing ri chèile agus gus conaltradh mun dòigh-obrach a b’ fheàrr a thaobh fèin-fhiosrachadh nan oileanach, margaidheachd agus co-obrachadh gnothachas-coimhearsnachd.

An dèidh nan conaltraidhean sin, tha UHI a Tuath, an Iar is Innse Gall air dearbhadh gun tabhann iad an teisteanas NC Gnìomhachasan Cruthachail, a leigeas leotha leantainn air adhart leis an tairgse ealain agus dealbhadh ach a dh’fhosglas suas cothroman gnìomhachasan cruthachail nas fharsainge tro chùrsaichean goirid no ionnsachadh air-loidhne. 

Thuirt Doug Rattray, Ceannard Roinn Gnìomhachasan Cùraim agus Cruthachail (Innse Gall), UHI a Tuath, an Iar is Innse Gall:  “Tha an teisteanas seo a’ tabhann dhuinn frèam-obrach a tha tòrr nas sùbailte gus a bhith a’ tairgse prògram ealain agus dealbhadh làn-thìde stèidhichte ann an ionad ach cuideachd cùrsaichean goirid nas fharsainge de na gnìomhachasan cruthachail ma bhios iarrtas ann air an son aig Taigh Chearsabhagh.  Tha am frèam-obrach seo cuideachd a’ cruthachadh ùrlar do dh’oileanaich a bhith a’ dol air adhart gu taghadh nas fharsainge de chothroman fo-cheum, iar-cheum agus rannsachaidh.  Tha mi airson taing phoblach a thoirt dhan fheadhainn a tha air na fèin-fhiosrachaidhean agus na lèirsinnean aca a cho-roinn agus a bhith a’ cuideachadh na colaiste a bhith ag atharrachadh a tairgse ann an dòigh a tha a’ leantainn air adhart a bhith gu luach ar coimhearsnachdan dùthchail agus eileanach agus tha sinn an dòchas gum bi e comasach dhuinn a bhith ag obair còmhla gus a bhith ag adhartachadh ar tairgse agus na cothroman air na h-eileanan.”